Kvernaland blir filial nummer to i Terje Fatland si ferske satsing på bilvask, så står Orstad for tur med det som blir kjedens første storbilvask. Målet er at Bilvask 24/7 skal veksa raskt utover i regionen.

Frå før driv Terje Fatland fire bensinstasjonar og ein dekk-kjede. No satsar Bryne-mannen stort på sin eigen bilvask-kjede: Bilvask 24/7.

Den aller første filialen opna Terje Fatland i Bedriftsvegen på Håland våren 2020. Sidan nyttår har handverkarane vore i full gang med å pussa opp den tidlegare bensinstasjonen i O.G. Kvernelands veg på Kvernaland, der Bilvask 24/7-avdeling nummer to opnar i februar/mars.

Fatland har også sikra seg ein hall i entreprenørfirmaet Bjelland sine tidlegare lokale på Orstad, der den tredje filialen opnar seinare i vår. På Orstad satsar Fatland på vask av store bilar – alt frå store varebilar til bubilar og dei fleste variantar av lastebilar, heilt opp til vogntog.

– Det blir Norges første storbilvask med abonnementsløysing, seier Fatland.

Veks med Bryne som utgangspunkt

Fatland ser etter tomter og lokale for å etablera nye Bilvask 24/7-avdelingar.

– Me har fleire etableringar på gang. Planen er å veksa utover, med Bryne som utgangspunkt.

– Kor raskt planlegg de å veksa?

– Ved utløpet av 2022 vil fire-fem avdelingar allereie vera i drift. Og så er det tilgangen på tomter og lokale som vil styra tempoet framover.

– Og kor stoppar det geografiske området du ser føre deg? 

– Det har eg ikkje tenkt å leggja begrensningar på, seier Terje Fatland med eit smil.

Satsar på abonnement

Bilvask 24/7 satsar hovudsakleg på vaskeautomatar for personbilar og små varebilar. Men også på sjølvvaskehallar og storbilvask dei stadene det er plass og potensial til det.

Den første filialen på Bryne består av ein maskinvaskehall for person- og varebilar, og i tillegg to sjølvvaskehallar som også kan ta imot større bilar, som for eksempel bubilar.

– Det kan vera vanskeleg og farleg å koma til og vaska oppe på taket på bubilen. Her har me både gangbru og vaskeutstyr i høgda, slik at det blir lett og trygt å koma til, seier Fatland.

Det er mogeleg å kjøpa enkeltvask hos Bilvask 24/7, men den nye kjeden satsar først og fremst på abonnement, der kundane betalar ein sum per månad og kan vaska bilen så mykje dei vil.

– På Bryne har eg ein av landets reinaste bilvask-køar. Det er mange som kommenterer det, seier Fatland med eit smil.

For når kunden allereie har betalt ein fast pris på førehand, blir det til at dei svingar oftare innom vaskehallen med bilen.

– No er eg spent på om tilbodet om abonnement kjem til å slå til på Kvernaland også. Abonnementa våre kjem forresten til å gjelda i alle avdelingane, så kundane får fleire valmogelegheiter etter kvart som Bilvask 24/7 veks, seier Fatland.

Tilgjengeleg 24/7

Bilvask 24/7 inneber også at gründeren sjølv er tilgjengeleg 24 timar i døgnet 7 dagar i veka. Det er hans mobiltelefon som ringjer først viss nokon treng assistanse i vaskehallen.

– Eg likar å vera tett på kundane, og at eg er den første som får beskjed viss noko ikkje er som det skal. Det er gjennom dialogen med kundane me klarar å justera oss, og å byggja opp noko skikkeleg godt, seier Fatland.

Å vera tilgjengeleg heile tida er ikkje noko nytt for 51-åringen. Dét – og å jobba lange dagar og i rykk og napp – har han vore vant med heilt sidan han begynte for seg sjølv som 23-åring i 1993.

– Eg har ein tolmodig familie. Utan det hadde eg ikkje kunna halda på slik eg gjer, slår Fatland fast.

Har jobba med bil heile livet

Terje Fatland er opprinneleg frå Tau, og begynte å jobba på bensinstasjon i heimbygda ved konfirmasjonsalderen. Etter ungdomsskulen gjekk han eit praktisk løp som bilmekanikar-lærling og tok fagbrev.

Før han reiste i militæret, tok han kontakt med bilforhandlar Gabriel Ålgård og lurte på om det ikkje kunne vera ein tanke å etablera ei Ryfylke-avdeling.

– Han tente på ideen, og sa at det ville han vera med på, viss eg kunne skaffa lokale medinvestorar. Det gjorde eg, så då eg var ferdig i militæret, bygde me opp den nye bilbutikken på Tau, fortel Fatland.

Eit godt år seinare opna sjansen seg til å overta bensinstasjonen midt i Sandnes sentrum. Det var då Terje Fatland begynte for seg sjølv, og det var då han flytta til Jæren – først til Lyefjell, seinare til Bryne.

Han driv framleis XY 7-Eleven-stasjonen i Sandnes sentrum, og i tillegg YX 7-Eleven-stasjonane på Blåsenborg i Stavanger, på Ålgård og på Helleland.

Gjennom Fatland Investering AS er han også majoritetseigar i Dekk & Service Sandnes AS; dekkverksemda som blei oppretta på Kvål for 14 år sidan då verkstad-delen av Fatland sin bensinstasjon i Sandnes måtte vika for ein ny vaskehall. Kim Byrkjedal er dagleg leiar og mediegar i Dekk & Service, som i dag har avdelingar i Sandnes, på Bryne, på Ålgård og på Kvernaland.

Totalt er bedriftene til Fatland no arbeidsplass for 55 personar.

– Eg er så heldig å ha med meg mange gode folk, både avdelingsleiarar og andre, seier Fatland.

Einaste tilsette, førebels

Førebels er eigaren sjølv den einaste tilsette i Bilvask 24/7, som han etablerte som eit eige aksjeselskap i haust.

– Kor mange tilsette kan det bli i vaskeverksemda etter kvart?

– Det gjenstår å sjå. Me byggjer stein på stein, så får me ta det derfrå. Jobben med vaskehallane handlar jo først og fremst tilsyn og vedlikehald, pluss arbeidet med etablering. Etter kvart som me veks, vil me nok ha behov for eigne tilsette og utvida vaktordningar, seier Fatland, som per i dag spelar på ressursar frå bensinstasjonane og dekkbutikkane.

– Viss eg for eksempel ikkje kan ta telefonen frå vaskehallen, blir han kopla vidare til nokon av dei andre i systemet, forklarar Fatland.

På Bryne held søsterbedrifta Dekk & Service til i nabolokalet. Slik blir det på Kvernaland også, der tidlegare Rolfs Dekk frå nyttår blei til ein ny Dekk & Service-filial. Rolf Skjæveland eig framleis eigedommen, men Fatland har inngått ein langsiktig leigeavtale for dei to bedriftene sine, og skal både byggja om delar av det innvendige og pussa opp fasadane.

– Dekkbutikken er på plass allereie, men me vågar ikkje å seia ein nøyaktig opningsdato for Bilvask 24/7 her på Kvernaland. Det blir nok i løpet av februar eller tidleg i mars. Nett no ventar me på maskinane, men som så mange andre no for tida, opplever me forseinkingar med leveringa. Det er store problem med vareflyten ute i verda, seier Fatland.

Han gler seg også til å opna den nye filialen på Orstad, sannynlegvis rundt påsketider. Dette blir den aller første storbilvasken i kjeden.

Fatland fortel at han alltid har vore interessert i bilvask. Tre av dei fire bensinstasjonane hans har vaskeautomatar, og gjennom mange år har han følgt med på internasjonale trendar i bransjen. Med jamne mellomrom har han reist rundt i Europa for å sjå på nyvinningar, og han har til og med vore på bilvask-messe i Las Vegas.

– Kunnskap er viktig, uansett kva du driv med, slår Fatland fast.

Ser etter stader der bilistar bur og ferdast

– Du skal etablera deg mange stader. Kva ser du etter når du skal finna den rette staden?

– Det viktigaste med nye lokasjonar er at dei ligg nær der kor folk bur og ferdast, slik at det er lettvint å stikka innom når det passar, utan å måtta køyra for langt etterpå. Eksempel kan vera eksisterende hallar, saman med anna verksemd, eller rett og slett ei tomt til sals eller leige der me kan byggja nytt, seier Fatland.

Styresmaktene stiller strenge miljøkrav til bilvask-aktørar.

– I tillegg til å oppfylla desse krava, vil me på det nye anlegget på Orstad testa ut vanngjennvinning. Anlegget vil kunna gjennvinna opp mot 90 prosent av vatnet som blir brukt. Me planlegg at vanngjenvinning skal bli standarden i samband med Bilvask 24/7 sine nybygg fremover, seier Fatland.

Teksten er fra en artikkel i Jærbladet.

Skrevet av Åge Bjørnevik, journalist i Jærbladet